Sa isang iglap na pagdanas ng pighati at kalumbayan Ay nilimot, nilisan hindi na binalikan- Ang pusong umasa, Naghangad at nangarap.
Sa mga salitang binitiwan, ay iningatan at pinanghawakan Nang walang pag-aalinlangan Sa mundo mong lulan ng kaguluhan Dahil sabi mo- Ako ang bahagharing nagbigay kulay sa mundo mo Ako ang mapang nagbigay direksyon sa magulong buhay mo
Ngunit, tila ba ikinahon ng panahon at mga pagkakataon Ang mga salitang inipon nang ilang taon I'kay sumuko at hindi na muling bumangon
Tila Ako muta sa iyong mga mata Na kailanma'y hindi mo nakita Tila Ako isang mahika na sa iyo'y nagpamangha Ngunit kailanma'y hindi naniwala
– Image from Google –
Hindi mo ba alam o sadyang nilimot mo lang Hindi mo ba ramdam o sadyang manhid ka lang? Sa katotohanang - ilang beses ng narinig Ilang beses ng sinambit pero hindi pa rin batid
Mahal kita, oo mahal kita Dahil ikaw, oo ikaw Ikaw ang dahilan ng pagparito Ikaw ang dahilan ng kalbaryo
Ngayon sasabihin ko sa'yo kung sino Ako;
Ako ang tubig na papawi sa uhaw mo, Ako ang bato na masasandalan mo sa gitna ng bagyo Ako ang ilaw na magbibigay tanglaw sa madilim mong mundo Ako ang kapayapaan sa napapagal mong puso
Kumakatok Ako- Kumakatok sa puso mo Kumakatok sa pinto ng buhay mo Papapasukin mo ba Ako?
